香港人o既打機心態及對勝負重視o既程度

pigwai - 可能你地會覺得呢D topic講o黎都

可能你地會覺得呢D topic講o黎都冇用，但而家我反而覺得有需要再討論一下。

打機打左咁多年，或多或少都見識左好多野，雖則自己打機唔係咁叻，同埋o係最初打機o個兩三年仲產生左輸唔起o既心態，但自從上o黎fightclub呢度之後，我終於都改變左打機o既心態。

o係06至08年間入左醫院，呢段時間冇再打機，唔知道呢段時間D人打機o既心態係點樣；到我出左院之後先至發覺仍然有某些玩家冇去改善佢地打機o既心態，成日話人地狗，話人地屈機，尤其係有D人甚至為左勝負而上演真人kof，又要玩又要唔俾人嬴佢，輸左就推機、爆粗、熄機，再唔係就以暴力解決問題，究竟佢地想點呢？

當然，唔係所有遊戲都有呢個情況，同埋我唔係一竹杆打沉一船人，不過我實在真係睇唔過眼，打機o者，唔使發脾氣呀？一係就囂張到死，狂寸o個D落敗o既玩家，特別係KOF特別嚴重，所以我都唔敢去o個D好多染金毛、成個古惑仔look駐場o既機鋪，費事嬴左佢地就俾佢地打到飛起。

我相信o係大部份有打機習慣o既人都比較善良，唔會太介意輸嬴，但偏偏有少部份害群之馬經常恃強凌弱，自己挑人地機以為自己好鬼勁，但當俾人打嬴時又不忿落敗，想盡辦法不惜一切報復，唔夠人打就郁D發爛渣，根本唔識得控制自己o既情緒，唔知大家記唔記得幾年前o係慈雲山某機鋪打機打到打死人單野，呢D就係一個反面例子，不過呢D都只不過係冰山一角，可能我慶幸未見過「大場面」啦，就算見到都只會企埋一邊當睇騷。

至於大家對勝負o既法，o係呢度大家都講到口水都乾埋，但我不厭其煩再講多少少。唔知點解拳皇呢隻遊戲會有咁多不愉快o既情況出現，衍生左一D特殊o既打機術語例如狗西、屈機等等，有D人玩開「國際例」，但有D人就接受唔到呢D玩法，就算係著通o既撻都話屈機，我心諗咁不如唔好玩啦，更何況係「走佬」、「捕升」、「下重拳」等，如果咁都話狗，咁我冇野好講咯。

講住咁多先，等我再諗到D咩就再同大家分享啦。 :171: